Abhidhamma Piṭaka 5.7.2

Sampayuttakathā

Natthi keci dhammā kehici dhammehi sampayuttāti? Āmantā. Nanu atthi keci dhammā kehici dhammehi sahagatā sahajātā saṁsaṭṭhā ekuppādā ekanirodhā ekavatthukā ekārammaṇāti? Āmantā. Hañci atthi keci dhammā kehici dhammehi sahagatā sahajātā saṁsaṭṭhā ekuppādā ekanirodhā ekavatthukā ekārammaṇā, no ca vata re vattabbe— “natthi keci dhammā kehici dhammehi sampayuttā”ti.

Vedanākkhandho saññākkhandhena sahajātoti? Āmantā. Hañci vedanākkhandho saññākkhandhena sahajāto, tena vata re vattabbe— “vedanākkhandho saññākkhandhena sampayutto”ti.

Vedanākkhandho saṅkhārakkhandhena … viññāṇakkhandhena sahajātoti? Āmantā. Hañci vedanākkhandho viññāṇakkhandhena sahajāto, tena vata re vattabbe— “vedanākkhandho viññāṇakkhandhena sampayutto”ti.

Saññākkhandho … saṅkhārakkhandho … viññāṇakkhandho vedanākkhandhena … saññākkhandhena … saṅkhārakkhandhena sahajātoti? Āmantā. Hañci viññāṇakkhandho saṅkhārakkhandhena sahajāto, tena vata re vattabbe— “viññāṇakkhandho saṅkhārakkhandhena sampayutto”ti.

Yathā tilamhi telaṁ anugataṁ anupaviṭṭhaṁ, ucchumhi raso anugato anupaviṭṭho; evameva te dhammā tehi dhammehi anugatā anupaviṭṭhāti? Na hevaṁ vattabbe …pe….