Pāli · Abhidhamma Piṭaka (Pāli, Mahāsaṅgīti)
Saddaṁsuṇātītikathā
Samāpanno saddaṁ suṇātīti? Āmantā. Samāpanno cakkhunā rūpaṁ passati …pe… sotena …pe… ghānena …pe… jivhāya …pe… kāyena phoṭṭhabbaṁ phusatīti? Na hevaṁ vattabbe …pe….
TheravādaAbhidhamma Piṭaka 5.18.8HOLYMAP · SACRED TEXTS
Abhidhamma Piṭaka
Abhidhamma Piṭaka 5.18.8
Saddaṁsuṇātītikathā
Pāli · Abhidhamma Piṭaka (Pāli, Mahāsaṅgīti)
Samāpanno saddaṁ suṇātīti? Āmantā. Sotaviññāṇasamaṅgī samāpannoti? Na hevaṁ vattabbe. Nanu samādhi manoviññāṇasamaṅgissāti? Āmantā. Hañci samādhi manoviññāṇasamaṅgissa, no ca vata re vattabbe— “samāpanno saddaṁ suṇātī”ti.
Pāli · Abhidhamma Piṭaka (Pāli, Mahāsaṅgīti)
Samādhi manoviññāṇasamaṅgissa, sotaviññāṇasamaṅgī saddaṁ suṇātīti? Āmantā. Hañci samādhi manoviññāṇasamaṅgissa, sotaviññāṇasamaṅgī saddaṁ suṇāti, no ca vata re vattabbe— “samāpanno saddaṁ suṇātī”ti. Samādhi manoviññāṇasamaṅgissa, sotaviññāṇasamaṅgī saddaṁ suṇātīti? Āmantā. Dvinnaṁ phassānaṁ …pe… dvinnaṁ cittānaṁ samodhānaṁ hotīti? Na hevaṁ vattabbe …pe….
Pāli · Abhidhamma Piṭaka (Pāli, Mahāsaṅgīti)
Na vattabbaṁ— “samāpanno saddaṁ suṇātī”ti? Āmantā. Nanu paṭhamassa jhānassa saddo kaṇṭako vutto bhagavatāti? Āmantā. Hañci paṭhamassa jhānassa saddo kaṇṭako vutto bhagavatā, tena vata re vattabbe— “samāpanno saddaṁ suṇātī”ti.
Pāli · Abhidhamma Piṭaka (Pāli, Mahāsaṅgīti)
Paṭhamassa jhānassa saddo kaṇṭako vutto bhagavatāti, samāpanno saddaṁ suṇātīti? Āmantā. Dutiyassa jhānassa vitakko vicāro kaṇṭako vutto bhagavatā, atthi tassa vitakkavicārāti? Na hevaṁ vattabbe …pe….
Pāli · Abhidhamma Piṭaka (Pāli, Mahāsaṅgīti)
Paṭhamassa jhānassa saddo kaṇṭako vutto bhagavatāti, samāpanno saddaṁ suṇātīti? Āmantā. Tatiyassa jhānassa pīti kaṇṭako …pe… catutthassa jhānassa assāsapassāso kaṇṭako … ākāsānañcāyatanaṁ samāpannassa rūpasaññā kaṇṭako … viññāṇañcāyatanaṁ samāpannassa ākāsānañcāyatanasaññā kaṇṭako … ākiñcaññāyatanaṁ samāpannassa viññāṇañcāyatanasaññā kaṇṭako … nevasaññānāsaññāyatanaṁ samāpannassa ākiñcaññāyatanasaññā kaṇṭako … saññāvedayitanirodhaṁ samāpannassa saññā ca vedanā ca kaṇṭako vutto bhagavatā, atthi tassa saññā ca vedanā cāti? Na hevaṁ vattabbe …pe….