Abhidhamma Piṭaka
Aviññattidussilyantikathā
Aviññattidussilyantikathā
Aviññatti dussilyanti? Āmantā. Pāṇātipātoti? Na hevaṁ vattabbe …pe… adinnādānanti? Na hevaṁ vattabbe …pe… kāmesumicchācāroti? Na hevaṁ vattabbe …pe… musāvādoti? Na hevaṁ vattabbe …pe… surāmerayamajjapamādaṭṭhānanti? Na hevaṁ vattabbe …pe….
Pāpakammaṁ samādiyitvā dānaṁ dadantassa puññañca apuññañca ubho vaḍḍhantīti? Na hevaṁ vattabbe …pe… puññañca apuññañca ubho vaḍḍhantīti? Āmantā. Dvinnaṁ phassānaṁ …pe… dvinnaṁ cittānaṁ samodhānaṁ hotīti? Na hevaṁ vattabbe …pe… dvinnaṁ phassānaṁ …pe… dvinnaṁ cittānaṁ samodhānaṁ hotīti? Āmantā. Kusalākusalā sāvajjānavajjā hīnapaṇītā kaṇhasukkasappaṭibhāgā dhammā sammukhībhāvaṁ āgacchantīti? Na hevaṁ vattabbe …pe….
Kusalākusalā sāvajjānavajjā hīnapaṇītā kaṇhasukkasappaṭibhāgā dhammā sammukhībhāvaṁ āgacchantīti? Āmantā. Nanu vuttaṁ bhagavatā— “cattārimāni, bhikkhave, suvidūravidūrāni. Katamāni cattāri? Nabhañca, bhikkhave, pathavī ca— idaṁ paṭhamaṁ suvidūravidūraṁ …pe… tasmā sataṁ dhammo asabbhi ārakā”ti. Attheva suttantoti? Āmantā. Tena hi na vattabbaṁ— “kusalākusalā sāvajjānavajjā hīnapaṇītā kaṇhasukkasappaṭibhāgā dhammā sammukhībhāvaṁ āgacchantī”ti …pe….
Na vattabbaṁ— “aviññatti dussilyan”ti? Āmantā. Nanu pāpakammaṁ samādinno āsīti? Āmantā. Hañci pāpakammaṁ samādinno āsi, tena vata re vattabbe— “aviññatti dussilyan”ti.