Abhidhamma Piṭaka 5.12.9

Duggatikathā

Diṭṭhisampannassa puggalassa pahīnā duggatīti? Āmantā. Diṭṭhisampanno puggalo āpāyike rūpe rajjeyyāti? Āmantā. Hañci diṭṭhisampanno puggalo āpāyike rūpe rajjeyya, no ca vata re vattabbe— “diṭṭhisampannassa puggalassa pahīnā duggatī”ti.

Diṭṭhisampannassa puggalassa pahīnā duggatīti? Āmantā. Diṭṭhisampanno puggalo āpāyike sadde …pe… gandhe … rase … phoṭṭhabbe …pe… amanussitthiyā tiracchānagatitthiyā nāgakaññāya methunaṁ dhammaṁ paṭiseveyya, ajeḷakaṁ paṭiggaṇheyya, kukkuṭasūkaraṁ paṭiggaṇheyya, hatthigavassavaḷavaṁ paṭiggaṇheyya … tittiravaṭṭakamorakapiñjaraṁ paṭiggaṇheyyāti? Āmantā. Hañci diṭṭhisampanno puggalo tittiravaṭṭakamorakapiñjaraṁ paṭiggaṇheyya, no ca vata re vattabbe— “diṭṭhisampannassa puggalassa pahīnā duggatī”ti.

Diṭṭhisampannassa puggalassa pahīnā duggati, diṭṭhisampanno puggalo āpāyike rūpe rajjeyyāti? Āmantā. Arahato pahīnā duggati, arahā āpāyike rūpe rajjeyyāti? Na hevaṁ vattabbe …pe… diṭṭhisampannassa puggalassa pahīnā duggati, diṭṭhisampanno puggalo āpāyike sadde … gandhe … rase … phoṭṭhabbe …pe… tittiravaṭṭakamorakapiñjaraṁ paṭiggaṇheyyāti? Āmantā. Arahato pahīnā duggati, arahā tittiravaṭṭakamorakapiñjaraṁ paṭiggaṇheyyāti? Na hevaṁ vattabbe …pe….

Arahato pahīnā duggati, na ca arahā āpāyike rūpe rajjeyyāti? Āmantā. Diṭṭhisampannassa puggalassa pahīnā duggati, na ca diṭṭhisampanno puggalo āpāyike rūpe rajjeyyāti? Na hevaṁ vattabbe …pe… arahato pahīnā duggati, na ca arahā āpāyike sadde …pe… gandhe …pe… rase …pe… phoṭṭhabbe …pe… amanussitthiyā tiracchānagatitthiyā nāgakaññāya methunaṁ dhammaṁ paṭiseveyya, ajeḷakaṁ paṭiggaṇheyya, kukkuṭasūkaraṁ paṭiggaṇheyya, hatthigavassavaḷavaṁ paṭiggaṇheyya …pe… tittiravaṭṭakamorakapiñjaraṁ paṭiggaṇheyyāti? Āmantā. Diṭṭhisampannassa puggalassa pahīnā duggati, na ca diṭṭhisampanno puggalo tittiravaṭṭakamorakapiñjaraṁ paṭiggaṇheyyāti? Na hevaṁ vattabbe …pe….

Na vattabbaṁ— “diṭṭhisampannassa puggalassa pahīnā duggatī”ti? Āmantā. Diṭṭhisampanno puggalo nirayaṁ upapajjeyya …pe… tiracchānayoniṁ upapajjeyya … pettivisayaṁ upapajjeyyāti? Na hevaṁ vattabbe. Tena hi diṭṭhisampannassa puggalassa pahīnā duggatīti.