Abhidhamma Piṭaka
Parihānikathā
Parihānikathā Vādayuttiparihāni
Parihāyati arahā arahattāti? Āmantā. Sabbattha arahā arahattā parihāyatīti? Na hevaṁ vattabbe …pe… sabbattha arahā arahattā parihāyatīti? Āmantā. Sabbattha arahato parihānīti? Na hevaṁ vattabbe …pe….
Parihāyati arahā arahattāti? Āmantā. Sabbadā arahā arahattā parihāyatīti? Na hevaṁ vattabbe …pe… sabbadā arahā arahattā parihāyatīti? Āmantā. Sabbadā arahato parihānīti? Na hevaṁ vattabbe …pe….
Parihāyati arahā arahattāti? Āmantā. Sabbeva arahanto arahattā parihāyantīti? Na hevaṁ vattabbe …pe… sabbeva arahanto arahattā parihāyantīti? Āmantā. Sabbesaṁyeva arahantānaṁ parihānīti? Na hevaṁ vattabbe …pe….
Parihāyati arahā arahattāti? Āmantā. Arahā arahattā parihāyamāno catūhi phalehi parihāyatīti? Na hevaṁ vattabbe …pe….
Catūhi satasahassehi seṭṭhī seṭṭhittaṁ kārento satasahasse parihīne seṭṭhittā parihīno hotīti? Āmantā. Sabbasāpateyyā parihīno hotīti? Na hevaṁ vattabbe …pe….
Catūhi satasahassehi seṭṭhī seṭṭhittaṁ kārento satasahasse parihīne bhabbo sabbasāpateyyā parihāyitunti? Āmantā. Arahā arahattā parihāyamāno bhabbo catūhi phalehi parihāyitunti? Na hevaṁ vattabbe …pe….
Ariyapuggalasaṁsandanaparihāni
Parihāyati arahā arahattāti? Āmantā. Parihāyati sotāpanno sotāpattiphalāti? Na hevaṁ vattabbe …pe….
Parihāyati arahā arahattāti? Āmantā. Parihāyati sakadāgāmī sakadāgāmiphalāti? Na hevaṁ vattabbe …pe….
Parihāyati arahā arahattāti? Āmantā. Parihāyati anāgāmī anāgāmiphalāti? Na hevaṁ vattabbe …pe….
Parihāyati anāgāmī anāgāmiphalāti? Āmantā. Parihāyati sotāpanno sotāpattiphalāti? Na hevaṁ vattabbe …pe….
Parihāyati anāgāmī anāgāmiphalāti? Āmantā. Parihāyati sakadāgāmī sakadāgāmiphalāti? Na hevaṁ vattabbe …pe….
Parihāyati sakadāgāmī sakadāgāmiphalāti? Āmantā. Parihāyati sotāpanno sotāpattiphalāti? Na hevaṁ vattabbe …pe….
Na parihāyati sotāpanno sotāpattiphalāti? Āmantā. Na parihāyati arahā arahattāti? Na hevaṁ vattabbe …pe….
Na parihāyati sakadāgāmī sakadāgāmiphalāti? Āmantā. Na parihāyati arahā arahattāti? Na hevaṁ vattabbe …pe….
Na parihāyati anāgāmī anāgāmiphalāti? Āmantā. Na parihāyati arahā arahattāti? Na hevaṁ vattabbe …pe….
Na parihāyati sotāpanno sotāpattiphalāti? Āmantā. Na parihāyati anāgāmī anāgāmiphalāti? Na hevaṁ vattabbe …pe….
Na parihāyati sakadāgāmī sakadāgāmiphalāti? Āmantā. Na parihāyati anāgāmī anāgāmiphalāti? Na hevaṁ vattabbe …pe….
Na parihāyati sotāpanno sotāpattiphalāti? Āmantā. Na parihāyati sakadāgāmī sakadāgāmiphalāti? Na hevaṁ vattabbe …pe….
Parihāyati arahā arahattāti? Āmantā. Arahā arahattā parihāyamāno kattha saṇṭhātīti? Anāgāmiphaleti. Anāgāmī anāgāmiphalā parihāyamāno kattha saṇṭhātīti? Sakadāgāmiphaleti. Sakadāgāmī sakadāgāmiphalā parihāyamāno kattha saṇṭhātīti? Sotāpattiphaleti. Sotāpanno sotāpattiphalā parihāyamāno puthujjanabhūmiyaṁ saṇṭhātīti? Na hevaṁ vattabbe.
Ājānāhi niggahaṁ. Hañci arahā arahattā parihāyamāno anāgāmiphale saṇṭhāti, anāgāmī anāgāmiphalā parihāyamāno sakadāgāmiphale saṇṭhāti, sakadāgāmī sakadāgāmiphalā parihāyamāno sotāpattiphale saṇṭhāti; tena vata re vattabbe— “sotāpanno sotāpattiphalā parihāyamāno puthujjanabhūmiyaṁ saṇṭhātī”ti.
Arahā arahattā parihāyamāno sotāpattiphale saṇṭhātīti? Āmantā. Sotāpattiphalassa anantarā arahattaṁyeva sacchikarotīti? Na hevaṁ vattabbe …pe….
Parihāyati arahā arahattāti? Āmantā. Parihāyati sotāpanno sotāpattiphalāti? Na hevaṁ vattabbe …pe… kassa bahutarā kilesā pahīnā arahato vā sotāpannassa vāti? Arahato. Hañci arahato bahutarā kilesā pahīnā, parihāyati arahā arahattā; tena vata re vattabbe— “parihāyati sotāpanno sotāpattiphalā”ti.
Parihāyati arahā arahattāti? Āmantā. Parihāyati sakadāgāmī sakadāgāmiphalāti? Na hevaṁ vattabbe …pe… kassa bahutarā kilesā pahīnā arahato vā sakadāgāmissa vāti? Arahato. Hañci arahato bahutarā kilesā pahīnā, parihāyati arahā arahattā; tena vata re vattabbe— “parihāyati sakadāgāmī sakadāgāmiphalā”ti.
Parihāyati arahā arahattāti? Āmantā. Parihāyati anāgāmī anāgāmiphalāti? Na hevaṁ vattabbe …pe… kassa bahutarā kilesā pahīnā arahato vā anāgāmissa vāti? Arahato. Hañci arahato bahutarā kilesā pahīnā, parihāyati arahā arahattā; tena vata re vattabbe— “parihāyati anāgāmī anāgāmiphalā”ti.
Parihāyati anāgāmī anāgāmiphalāti? Āmantā. Parihāyati sotāpanno sotāpattiphalāti? Na hevaṁ vattabbe …pe… kassa bahutarā kilesā pahīnā anāgāmissa vā sotāpannassa vāti? Anāgāmissa. Hañci anāgāmissa bahutarā kilesā pahīnā, parihāyati anāgāmī anāgāmiphalā; tena vata re vattabbe— “parihāyati sotāpanno sotāpattiphalā”ti.
Parihāyati anāgāmī anāgāmiphalāti? Āmantā. Parihāyati sakadāgāmī sakadāgāmiphalāti? Na hevaṁ vattabbe …pe… kassa bahutarā kilesā pahīnā anāgāmissa vā sakadāgāmissa vāti? Anāgāmissa. Hañci anāgāmissa bahutarā kilesā pahīnā, parihāyati anāgāmī anāgāmiphalā; tena vata re vattabbe— “parihāyati sakadāgāmī sakadāgāmiphalā”ti.
Parihāyati sakadāgāmī sakadāgāmiphalāti? Āmantā. Parihāyati sotāpanno sotāpattiphalāti? Na hevaṁ vattabbe …pe… kassa bahutarā kilesā pahīnā sakadāgāmissa vā sotāpannassa vāti? Sakadāgāmissa. Hañci sakadāgāmissa bahutarā kilesā pahīnā, parihāyati sakadāgāmī sakadāgāmiphalā; tena vata re vattabbe— “parihāyati sotāpanno sotāpattiphalā”ti.
Parihāyati arahā arahattāti? Āmantā. Parihāyati sotāpanno sotāpattiphalāti? Na hevaṁ vattabbe …pe… kassa adhimattā maggabhāvanā arahato vā sotāpannassa vāti? Arahato. Hañci arahato adhimattā maggabhāvanā, parihāyati arahā arahattā; tena vata re vattabbe— “parihāyati sotāpanno sotāpattiphalā”ti.
Parihāyati arahā arahattāti? Āmantā. Parihāyati sotāpanno sotāpattiphalāti? Na hevaṁ vattabbe …pe… kassa adhimattā satipaṭṭhānabhāvanā …pe… sammappadhānabhāvanā… iddhipādabhāvanā… indriyabhāvanā… balabhāvanā… bojjhaṅgabhāvanā arahato vā sotāpannassa vāti? Arahato. Hañci arahato adhimattā bojjhaṅgabhāvanā, parihāyati arahā arahattā; tena vata re vattabbe— “parihāyati sotāpanno sotāpattiphalā”ti.
Parihāyati arahā arahattāti? Āmantā. Parihāyati sakadāgāmī sakadāgāmiphalāti? Na hevaṁ vattabbe …pe… kassa adhimattā maggabhāvanā …pe… bojjhaṅgabhāvanā arahato vā sakadāgāmissa vāti? Arahato. Hañci arahato adhimattā bojjhaṅgabhāvanā, parihāyati arahā arahattā; tena vata re vattabbe— “parihāyati sakadāgāmī sakadāgāmiphalā”ti.
Parihāyati arahā arahattāti? Āmantā. Parihāyati anāgāmī anāgāmiphalāti? Na hevaṁ vattabbe …pe… kassa adhimattā maggabhāvanā …pe… bojjhaṅgabhāvanā arahato vā anāgāmissa vāti? Arahato. Hañci arahato adhimattā bojjhaṅgabhāvanā, parihāyati arahā arahattā; tena vata re vattabbe— “parihāyati anāgāmī anāgāmiphalā”ti.
Parihāyati anāgāmī anāgāmiphalāti? Āmantā. Parihāyati sotāpanno sotāpattiphalāti? Na hevaṁ vattabbe …pe… kassa adhimattā maggabhāvanā …pe… bojjhaṅgabhāvanā anāgāmissa vā sotāpannassa vāti? Anāgāmissa. Hañci anāgāmissa adhimattā bojjhaṅgabhāvanā, parihāyati anāgāmī anāgāmiphalā; tena vata re vattabbe— “parihāyati sotāpanno sotāpattiphalā”ti.
Parihāyati anāgāmī anāgāmiphalāti? Āmantā. Parihāyati sakadāgāmī sakadāgāmiphalāti? Na hevaṁ vattabbe …pe… kassa adhimattā maggabhāvanā …pe… bojjhaṅgabhāvanā anāgāmissa vā sakadāgāmissa vāti? Anāgāmissa. Hañci anāgāmissa adhimattā bojjhaṅgabhāvanā, parihāyati anāgāmī anāgāmiphalā; tena vata re vattabbe— “parihāyati sakadāgāmī sakadāgāmiphalā”ti.
Parihāyati sakadāgāmī sakadāgāmiphalāti? Āmantā. Parihāyati sotāpanno sotāpattiphalāti? Na hevaṁ vattabbe …pe… kassa adhimattā maggabhāvanā …pe… bojjhaṅgabhāvanā sakadāgāmissa vā sotāpannassa vāti? Sakadāgāmissa. Hañci sakadāgāmissa adhimattā bojjhaṅgabhāvanā, parihāyati sakadāgāmī sakadāgāmiphalā; tena vata re vattabbe— “parihāyati sotāpanno sotāpattiphalā”ti …pe….
Arahatā dukkhaṁ diṭṭhaṁ, parihāyati arahā arahattāti? Āmantā. Sotāpannena dukkhaṁ diṭṭhaṁ, parihāyati sotāpanno sotāpattiphalāti? Na hevaṁ vattabbe …pe….
Arahatā samudayo diṭṭho, parihāyati arahā arahattāti? Āmantā. Sotāpannena samudayo diṭṭho, parihāyati sotāpanno sotāpattiphalāti? Na hevaṁ vattabbe …pe….
Arahatā nirodho diṭṭho, parihāyati arahā arahattāti? Āmantā. Sotāpannena nirodho diṭṭho, parihāyati sotāpanno sotāpattiphalāti? Na hevaṁ vattabbe …pe….
Arahatā maggo diṭṭho, parihāyati arahā arahattāti? Āmantā. Sotāpannena maggo diṭṭho, parihāyati sotāpanno sotāpattiphalāti? Na hevaṁ vattabbe …pe….
Arahatā cattāri saccāni diṭṭhāni, parihāyati arahā arahattāti? Āmantā. Sotāpannena cattāri saccāni diṭṭhāni, parihāyati sotāpanno sotāpattiphalāti? Na hevaṁ vattabbe …pe….
Arahatā dukkhaṁ diṭṭhaṁ, parihāyati arahā arahattāti? Āmantā. Sakadāgāminā dukkhaṁ diṭṭhaṁ, parihāyati sakadāgāmī sakadāgāmiphalāti? Na hevaṁ vattabbe …pe….
Arahatā samudayo diṭṭho …pe… nirodho diṭṭho …pe… maggo diṭṭho …pe… cattāri saccāni diṭṭhāni, parihāyati arahā arahattāti? Āmantā. Sakadāgāminā cattāri saccāni diṭṭhāni, parihāyati sakadāgāmī sakadāgāmiphalāti? Na hevaṁ vattabbe …pe….
Arahatā dukkhaṁ diṭṭhaṁ, parihāyati arahā arahattāti? Āmantā. Anāgāminā dukkhaṁ diṭṭhaṁ, parihāyati anāgāmī anāgāmiphalāti? Na hevaṁ vattabbe …pe….
Arahatā samudayo diṭṭho …pe… nirodho diṭṭho …pe… maggo diṭṭho …pe… cattāri saccāni diṭṭhāni, parihāyati arahā arahattāti? Āmantā. Anāgāminā cattāri saccāni diṭṭhāni, parihāyati anāgāmī anāgāmiphalāti? Na hevaṁ vattabbe …pe….
Anāgāminā dukkhaṁ diṭṭhaṁ, parihāyati anāgāmī anāgāmiphalāti? Āmantā. Sotāpannena dukkhaṁ diṭṭhaṁ, parihāyati sotāpanno sotāpattiphalāti? Na hevaṁ vattabbe …pe….
Anāgāminā samudayo diṭṭho …pe… nirodho diṭṭho …pe… maggo diṭṭho …pe… cattāri saccāni diṭṭhāni, parihāyati anāgāmī anāgāmiphalāti? Āmantā. Sotāpannena cattāri saccāni diṭṭhāni, parihāyati sotāpanno sotāpattiphalāti? Na hevaṁ vattabbe …pe….
Anāgāminā dukkhaṁ diṭṭhaṁ, parihāyati anāgāmī anāgāmiphalāti? Āmantā. Sakadāgāminā dukkhaṁ diṭṭhaṁ, parihāyati sakadāgāmī sakadāgāmiphalāti? Na hevaṁ vattabbe …pe….
Anāgāminā samudayo diṭṭho …pe… nirodho diṭṭho …pe… maggo diṭṭho …pe… cattāri saccāni diṭṭhāni, parihāyati anāgāmī anāgāmiphalāti? Āmantā. Sakadāgāminā cattāri saccāni diṭṭhāni, parihāyati sakadāgāmī sakadāgāmiphalāti? Na hevaṁ vattabbe …pe….
Sakadāgāminā dukkhaṁ diṭṭhaṁ, parihāyati sakadāgāmī sakadāgāmiphalāti? Āmantā. Sotāpannena dukkhaṁ diṭṭhaṁ, parihāyati sotāpanno sotāpattiphalāti? Na hevaṁ vattabbe …pe….
Sakadāgāminā samudayo diṭṭho …pe… nirodho diṭṭho …pe… maggo diṭṭho …pe… cattāri saccāni diṭṭhāni, parihāyati sakadāgāmī sakadāgāmiphalāti? Āmantā. Sotāpannena cattāri saccāni diṭṭhāni, parihāyati sotāpanno sotāpattiphalāti? Na hevaṁ vattabbe …pe….
Sotāpannena dukkhaṁ diṭṭhaṁ, na parihāyati sotāpanno sotāpattiphalāti? Āmantā. Arahatā dukkhaṁ diṭṭhaṁ, na parihāyati arahā arahattāti? Na hevaṁ vattabbe …pe….
Sotāpannena samudayo diṭṭho …pe… nirodho diṭṭho …pe… maggo diṭṭho …pe… cattāri saccāni diṭṭhāni, na parihāyati sotāpanno sotāpattiphalāti? Āmantā. Arahatā cattāri saccāni diṭṭhāni, na parihāyati arahā arahattāti? Na hevaṁ vattabbe …pe….
Sakadāgāminā dukkhaṁ diṭṭhaṁ …pe… cattāri saccāni diṭṭhāni, na parihāyati sakadāgāmī sakadāgāmiphalāti? Āmantā. Arahatā cattāri saccāni diṭṭhāni, na parihāyati arahā arahattāti? Na hevaṁ vattabbe …pe….
Anāgāminā dukkhaṁ diṭṭhaṁ …pe… cattāri saccāni diṭṭhāni, na parihāyati anāgāmī anāgāmiphalāti? Āmantā. Arahatā cattāri saccāni diṭṭhāni, na parihāyati arahā arahattāti? Na hevaṁ vattabbe …pe….
Sotāpannena dukkhaṁ diṭṭhaṁ …pe… cattāri saccāni diṭṭhāni, na parihāyati sotāpanno sotāpattiphalāti? Āmantā.
Anāgāminā dukkhaṁ diṭṭhaṁ …pe… cattāri saccāni diṭṭhāni, na parihāyati anāgāmī anāgāmiphalāti? Na hevaṁ vattabbe …pe….
Sakadāgāminā dukkhaṁ diṭṭhaṁ …pe… cattāri saccāni diṭṭhāni, na parihāyati sakadāgāmī sakadāgāmiphalāti? Āmantā. Anāgāminā dukkhaṁ diṭṭhaṁ …pe… cattāri saccāni diṭṭhāni, na parihāyati anāgāmī anāgāmiphalāti? Na hevaṁ vattabbe …pe….
Sotāpannena dukkhaṁ diṭṭhaṁ …pe… cattāri saccāni diṭṭhāni, na parihāyati sotāpanno sotāpattiphalāti? Āmantā. Sakadāgāminā dukkhaṁ diṭṭhaṁ …pe… cattāri saccāni diṭṭhāni, na parihāyati sakadāgāmī sakadāgāmiphalāti? Na hevaṁ vattabbe …pe….
Arahato rāgo pahīno, parihāyati arahā arahattāti? Āmantā. Sotāpannassa sakkāyadiṭṭhi pahīnā, parihāyati sotāpanno sotāpattiphalāti? Na hevaṁ vattabbe …pe….
Arahato rāgo pahīno, parihāyati arahā arahattāti? Āmantā. Sotāpannassa vicikicchā pahīnā …pe… sīlabbataparāmāso pahīno …pe… apāyagamanīyo rāgo pahīno …pe… apāyagamanīyo doso pahīno …pe… apāyagamanīyo moho pahīno, parihāyati sotāpanno sotāpattiphalāti? Na hevaṁ vattabbe …pe….
Arahato doso pahīno …pe… moho pahīno… māno pahīno… diṭṭhi pahīnā… vicikicchā pahīnā… thinaṁ pahīnaṁ… uddhaccaṁ pahīnaṁ… ahirikaṁ pahīnaṁ …pe… anottappaṁ pahīnaṁ, parihāyati arahā arahattāti? Āmantā. Sotāpannassa sakkāyadiṭṭhi pahīnā, parihāyati sotāpanno sotāpattiphalāti? Na hevaṁ vattabbe …pe….
Arahato anottappaṁ pahīnaṁ, parihāyati arahā arahattāti? Āmantā. Sotāpannassa vicikicchā pahīnā …pe… sīlabbataparāmāso pahīno …pe… apāyagamanīyo rāgo pahīno …pe… apāyagamanīyo doso pahīno …pe… apāyagamanīyo moho pahīno, parihāyati sotāpanno sotāpattiphalāti? Na hevaṁ vattabbe …pe….
Arahato rāgo pahīno, parihāyati arahā arahattāti? Āmantā. Sakadāgāmissa sakkāyadiṭṭhi pahīnā, parihāyati sakadāgāmī sakadāgāmiphalāti? Na hevaṁ vattabbe.
Arahato rāgo pahīno, parihāyati arahā arahattāti? Āmantā. Sakadāgāmissa vicikicchā pahīnā …pe… sīlabbataparāmāso pahīno …pe… oḷāriko kāmarāgo pahīno… oḷāriko byāpādo pahīno, parihāyati sakadāgāmī sakadāgāmiphalāti? Na hevaṁ vattabbe …pe….
Arahato doso pahīno …pe… anottappaṁ pahīnaṁ, parihāyati arahā arahattāti? Āmantā. Sakadāgāmissa sakkāyadiṭṭhi pahīnā …pe… oḷāriko byāpādo pahīno, parihāyati sakadāgāmī sakadāgāmiphalāti? Na hevaṁ vattabbe.
Arahato rāgo pahīno, parihāyati arahā arahattāti? Āmantā. Anāgāmissa sakkāyadiṭṭhi pahīnā, parihāyati anāgāmī anāgāmiphalāti? Na hevaṁ vattabbe …pe….
Arahato rāgo pahīno, parihāyati arahā arahattāti? Āmantā. Anāgāmissa vicikicchā pahīnā …pe… sīlabbataparāmāso pahīno… aṇusahagato kāmarāgo pahīno… aṇusahagato byāpādo pahīno, parihāyati anāgāmī anāgāmiphalāti? Na hevaṁ vattabbe.
Arahato doso pahīno …pe… anottappaṁ pahīnaṁ, parihāyati arahā arahattāti? Āmantā. Anāgāmissa sakkāyadiṭṭhi pahīnā …pe… aṇusahagato byāpādo pahīno, parihāyati anāgāmī anāgāmiphalāti? Na hevaṁ vattabbe.
Anāgāmissa sakkāyadiṭṭhi pahīnā, parihāyati anāgāmī anāgāmiphalāti? Āmantā. Sotāpannassa sakkāyadiṭṭhi pahīnā, parihāyati sotāpanno sotāpattiphalāti? Na hevaṁ vattabbe.
Anāgāmissa sakkāyadiṭṭhi pahīnā, parihāyati anāgāmī anāgāmiphalāti? Āmantā. Sotāpannassa vicikicchā pahīnā …pe… apāyagamanīyo moho pahīno, parihāyati sotāpanno sotāpattiphalāti? Na hevaṁ vattabbe.
Anāgāmissa vicikicchā pahīnā …pe… aṇusahagato byāpādo pahīno, parihāyati anāgāmī anāgāmiphalāti? Āmantā. Sotāpannassa sakkāyadiṭṭhi pahīnā …pe… apāyagamanīyo moho pahīno, parihāyati sotāpanno sotāpattiphalāti? Na hevaṁ vattabbe.
Anāgāmissa sakkāyadiṭṭhi pahīnā, parihāyati anāgāmī anāgāmiphalāti? Āmantā. Sakadāgāmissa sakkāyadiṭṭhi pahīnā, parihāyati sakadāgāmī sakadāgāmiphalāti? Na hevaṁ vattabbe.
Anāgāmissa sakkāyadiṭṭhi pahīnā, parihāyati anāgāmī anāgāmiphalāti? Āmantā. Sakadāgāmissa vicikicchā pahīnā …pe… sīlabbataparāmāso pahīno… oḷāriko kāmarāgo pahīno… oḷāriko byāpādo pahīno, parihāyati sakadāgāmī sakadāgāmiphalāti? Na hevaṁ vattabbe.
Anāgāmissa vicikicchā pahīnā …pe… aṇusahagato byāpādo pahīno, parihāyati anāgāmī anāgāmiphalāti? Āmantā. Sakadāgāmissa sakkāyadiṭṭhi pahīnā …pe… oḷāriko byāpādo pahīno, parihāyati sakadāgāmī sakadāgāmiphalāti? Na hevaṁ vattabbe.
Sakadāgāmissa sakkāyadiṭṭhi pahīnā, parihāyati sakadāgāmī sakadāgāmiphalāti? Āmantā. Sotāpannassa sakkāyadiṭṭhi pahīnā, parihāyati sotāpanno sotāpattiphalāti? Na hevaṁ vattabbe.
Sakadāgāmissa sakkāyadiṭṭhi pahīnā, parihāyati sakadāgāmī sakadāgāmiphalāti? Āmantā. Sotāpannassa vicikicchā pahīnā …pe… apāyagamanīyo moho pahīno, parihāyati sotāpanno sotāpattiphalāti? Na hevaṁ vattabbe.
Sakadāgāmissa vicikicchā pahīnā …pe… oḷāriko kāmarāgo pahīno… oḷāriko byāpādo pahīno, parihāyati sakadāgāmī sakadāgāmiphalāti? Āmantā. Sotāpannassa sakkāyadiṭṭhi pahīnā …pe… apāyagamanīyo moho pahīno, parihāyati sotāpanno sotāpattiphalāti? Na hevaṁ vattabbe.
Sotāpannassa sakkāyadiṭṭhi pahīnā, na parihāyati sotāpanno sotāpattiphalāti? Āmantā. Arahato rāgo pahīno, na parihāyati arahā arahattāti? Na hevaṁ vattabbe.
Sotāpannassa sakkāyadiṭṭhi pahīnā, na parihāyati sotāpanno sotāpattiphalāti? Āmantā. Arahato doso pahīno …pe… anottappaṁ pahīnaṁ, na parihāyati arahā arahattāti? Na hevaṁ vattabbe.
Sotāpannassa vicikicchā pahīnā …pe… apāyagamanīyo moho pahīno, na parihāyati sotāpanno sotāpattiphalāti? Āmantā. Arahato rāgo pahīno …pe… anottappaṁ pahīnaṁ, na parihāyati arahā arahattāti? Na hevaṁ vattabbe.
Sakadāgāmissa sakkāyadiṭṭhi pahīnā, na parihāyati sakadāgāmī sakadāgāmiphalāti? Āmantā. Arahato rāgo pahīno …pe… anottappaṁ pahīnaṁ, na parihāyati arahā arahattāti? Na hevaṁ vattabbe.
Sakadāgāmissa vicikicchā pahīnā …pe… oḷāriko byāpādo pahīno, na parihāyati sakadāgāmī sakadāgāmiphalāti? Āmantā. Arahato rāgo pahīno …pe… anottappaṁ pahīnaṁ, na parihāyati arahā arahattāti? Na hevaṁ vattabbe.
Anāgāmissa sakkāyadiṭṭhi pahīnā, na parihāyati anāgāmī anāgāmiphalāti? Āmantā. Arahato rāgo pahīno …pe… anottappaṁ pahīnaṁ, na parihāyati arahā arahattāti? Na hevaṁ vattabbe.
Anāgāmissa vicikicchā pahīnā …pe… aṇusahagato byāpādo pahīno, na parihāyati anāgāmī anāgāmiphalāti? Āmantā. Arahato rāgo pahīno …pe… anottappaṁ pahīnaṁ, na parihāyati arahā arahattāti? Na hevaṁ vattabbe.
Sotāpannassa sakkāyadiṭṭhi pahīnā, na parihāyati sotāpanno sotāpattiphalāti? Āmantā. Anāgāmissa sakkāyadiṭṭhi pahīnā … aṇusahagato byāpādo pahīno, na parihāyati anāgāmī anāgāmiphalāti? Na hevaṁ vattabbe.
Sotāpannassa vicikicchā pahīnā …pe… apāyagamanīyo moho pahīno, na parihāyati sotāpanno sotāpattiphalāti? Āmantā. Anāgāmissa sakkāyadiṭṭhi pahīnā …pe… aṇusahagato byāpādo pahīno, na parihāyati anāgāmī anāgāmiphalāti? Na hevaṁ vattabbe.
Sakadāgāmissa sakkāyadiṭṭhi pahīnā, na parihāyati sakadāgāmī sakadāgāmiphalāti? Āmantā. Anāgāmissa sakkāyadiṭṭhi pahīnā …pe… aṇusahagato byāpādo pahīno, na parihāyati anāgāmī anāgāmiphalāti? Na hevaṁ vattabbe.
Sakadāgāmissa vicikicchā pahīnā …pe… oḷāriko byāpādo pahīno, na parihāyati sakadāgāmī sakadāgāmiphalāti? Āmantā. Anāgāmissa sakkāyadiṭṭhi pahīnā …pe… aṇusahagato byāpādo pahīno, na parihāyati anāgāmī anāgāmiphalāti? Na hevaṁ vattabbe.
Sotāpannassa sakkāyadiṭṭhi pahīnā, na parihāyati sotāpanno sotāpattiphalāti? Āmantā. Sakadāgāmissa sakkāyadiṭṭhi pahīnā …pe… oḷāriko byāpādo pahīno, na parihāyati sakadāgāmī sakadāgāmiphalāti? Na hevaṁ vattabbe.
Sotāpannassa vicikicchā pahīnā …pe… apāyagamanīyo moho pahīno, na parihāyati sotāpanno sotāpattiphalāti? Āmantā. Sakadāgāmissa sakkāyadiṭṭhi pahīnā …pe… oḷāriko byāpādo pahīno, na parihāyati sakadāgāmī sakadāgāmiphalāti? Na hevaṁ vattabbe.
Parihāyati arahā arahattāti? Āmantā. Nanu arahato rāgo pahīno ucchinnamūlo tālāvatthukato anabhāvaṅkato āyatiṁ anuppādadhammoti? Āmantā. Hañci arahato rāgo pahīno ucchinnamūlo tālāvatthukato anabhāvaṅkato āyatiṁ anuppādadhammo, no ca vata re vattabbe— “parihāyati arahā arahattā”ti.
Parihāyati arahā arahattāti? Āmantā. Nanu arahato doso pahīno …pe… moho pahīno… māno pahīno… diṭṭhi pahīnā… vicikicchā pahīnā… thinaṁ pahīnaṁ… uddhaccaṁ pahīnaṁ… ahirikaṁ pahīnaṁ… anottappaṁ pahīnaṁ ucchinnamūlaṁ tālāvatthukataṁ anabhāvaṅkataṁ āyatiṁ anuppādadhammanti? Āmantā. Hañci arahato anottappaṁ pahīnaṁ ucchinnamūlaṁ tālāvatthukataṁ anabhāvaṅkataṁ āyatiṁ anuppādadhammaṁ, no ca vata re vattabbe— “parihāyati arahā arahattā”ti.
Parihāyati arahā arahattāti? Āmantā. Nanu arahato rāgappahānāya maggo bhāvitoti? Āmantā. Hañci arahato rāgappahānāya maggo bhāvito, no ca vata re vattabbe— “parihāyati arahā arahattā”ti.
Parihāyati arahā arahattāti? Āmantā. Nanu arahato rāgappahānāya satipaṭṭhānā bhāvitā …pe… sammappadhānā bhāvitā… iddhipādā bhāvitā… indriyā bhāvitā… balā bhāvitā… bojjhaṅgā bhāvitāti? Āmantā. Hañci arahato rāgappahānāya bojjhaṅgā bhāvitā, no ca vata re vattabbe— “parihāyati arahā arahattā”ti.
Parihāyati arahā arahattāti? Āmantā. Nanu arahato dosappahānāya …pe… anottappapahānāya maggo bhāvito …pe… bojjhaṅgā bhāvitāti? Āmantā. Hañci arahato anottappapahānāya bojjhaṅgā bhāvitā, no ca vata re vattabbe— “parihāyati arahā arahattā”ti.
Parihāyati arahā arahattāti? Āmantā. Nanu arahā vītarāgo vītadoso vītamoho katakaraṇīyo ohitabhāro anuppattasadattho parikkhīṇabhavasaṁyojano sammadaññāvimutto ukkhittapaligho saṅkiṇṇaparikho abbūḷhesiko niraggaḷo ariyo pannaddhajo pannabhāro visaññutto suvijitavijayo; dukkhaṁ tassa pariññātaṁ, samudayo pahīno, nirodho sacchikato, maggo bhāvito, abhiññeyyaṁ abhiññātaṁ, pariññeyyaṁ pariññātaṁ, pahātabbaṁ pahīnaṁ, bhāvetabbaṁ bhāvitaṁ, sacchikātabbaṁ sacchikatanti? Āmantā. Hañci arahā vītarāgo vītadoso vītamoho …pe… sacchikātabbaṁ sacchikataṁ, no ca vata re vattabbe— “parihāyati arahā arahattā”ti.
Parihāyati arahā arahattāti? (…) Samayavimutto arahā arahattā parihāyati, asamayavimutto arahā arahattā na parihāyatīti. Samayavimutto arahā arahattā parihāyatīti? Āmantā. Asamayavimutto arahā arahattā parihāyatīti? Na hevaṁ vattabbe.
Asamayavimutto arahā arahattā na parihāyatīti? Āmantā. Samayavimutto arahā arahattā na parihāyatīti? Na hevaṁ vattabbe.
Samayavimuttassa arahato rāgo pahīno, parihāyati samayavimutto arahā arahattāti? Āmantā. Asamayavimuttassa arahato rāgo pahīno, parihāyati asamayavimutto arahā arahattāti? Na hevaṁ vattabbe.
Samayavimuttassa arahato doso pahīno …pe… anottappaṁ pahīnaṁ, parihāyati samayavimutto arahā arahattāti? Āmantā. Asamayavimuttassa arahato anottappaṁ pahīnaṁ, parihāyati asamayavimutto arahā arahattāti? Na hevaṁ vattabbe.
Samayavimuttassa arahato rāgappahānāya maggo bhāvito, parihāyati samayavimutto arahā arahattāti? Āmantā. Asamayavimuttassa arahato rāgappahānāya maggo bhāvito, parihāyati asamayavimutto arahā arahattāti? Na hevaṁ vattabbe.
Samayavimuttassa arahato rāgappahānāya satipaṭṭhānā bhāvitā …pe… sammappadhānā bhāvitā… iddhipādā bhāvitā… indriyā bhāvitā… balā bhāvitā… bojjhaṅgā bhāvitā, parihāyati samayavimutto arahā arahattāti? Āmantā. Asamayavimuttassa arahato rāgappahānāya satipaṭṭhānā bhāvitā …pe… bojjhaṅgā bhāvitā, parihāyati asamayavimutto arahā arahattāti? Na hevaṁ vattabbe.
Samayavimuttassa arahato dosappahānāya …pe… anottappapahānāya maggo bhāvito …pe… bojjhaṅgā bhāvitā, parihāyati samayavimutto arahā arahattāti? Āmantā. Asamayavimuttassa arahato anottappaṁ pahānāya maggo bhāvito …pe… bojjhaṅgā bhāvitā, parihāyati asamayavimutto arahā arahattāti? Na hevaṁ vattabbe …pe….
Samayavimutto arahā vītarāgo vītadoso vītamoho katakaraṇīyo ohitabhāro anuppattasadattho parikkhīṇabhavasaṁyojano sammadaññāvimutto ukkhittapaligho saṅkiṇṇaparikho abbūḷhesiko niraggaḷo ariyo pannaddhajo pannabhāro visaññutto suvijitavijayo, dukkhaṁ tassa pariññātaṁ, samudayo pahīno, nirodho sacchikato, maggo bhāvito, abhiññeyyaṁ abhiññātaṁ, pariññeyyaṁ pariññātaṁ, pahātabbaṁ pahīnaṁ, bhāvetabbaṁ bhāvitaṁ, sacchikātabbaṁ sacchikataṁ, parihāyati samayavimutto arahā arahattāti? Āmantā. Asamayavimutto arahā vītarāgo vītadoso vītamoho …pe… sacchikātabbaṁ sacchikataṁ, parihāyati asamayavimutto arahā arahattāti? Na hevaṁ vattabbe.
Asamayavimuttassa arahato rāgo pahīno, na parihāyati asamayavimutto arahā arahattāti? Āmantā. Samayavimuttassa arahato rāgo pahīno, na parihāyati samayavimutto arahā arahattāti? Na hevaṁ vattabbe.
Asamayavimuttassa arahato doso pahīno …pe… anottappaṁ pahīnaṁ, na parihāyati asamayavimutto arahā arahattāti? Āmantā. Samayavimuttassa arahato anottappaṁ pahīnaṁ, na parihāyati samayavimutto arahā arahattāti? Na hevaṁ vattabbe.
Asamayavimuttassa arahato rāgappahānāya maggo bhāvito …pe… bojjhaṅgā bhāvitā, na parihāyati asamayavimutto arahā arahattāti? Āmantā. Samayavimuttassa arahato rāgappahānāya maggo bhāvito …pe… bojjhaṅgā bhāvitā, na parihāyati samayavimutto arahā arahattāti? Na hevaṁ vattabbe.
Asamayavimuttassa arahato dosappahānāya …pe… anottappapahānāya maggo bhāvito …pe… bojjhaṅgā bhāvitā, na parihāyati asamayavimutto arahā arahattāti? Āmantā. Samayavimuttassa arahato anottappapahānāya maggo bhāvito …pe… bojjhaṅgā bhāvitā, na parihāyati samayavimutto arahā arahattāti? Na hevaṁ vattabbe.
Asamayavimutto arahā vītarāgo vītadoso vītamoho …pe… sacchikātabbaṁ sacchikataṁ, na parihāyati asamayavimutto arahā arahattāti? Āmantā. Samayavimutto arahā vītarāgo vītadoso vītamoho …pe… sacchikātabbaṁ sacchikataṁ, na parihāyati samayavimutto arahā arahattāti? Na hevaṁ vattabbe …pe….
Parihāyati arahā arahattāti? Āmantā. Sāriputto thero parihāyittha arahattāti? Na hevaṁ vattabbe. Mahāmoggallāno thero … mahākassapo thero … mahākaccāyano thero … mahākoṭṭhiko thero … mahāpanthako thero parihāyittha arahattāti? Na hevaṁ vattabbe.
Sāriputto thero na parihāyittha arahattāti? Āmantā. Hañci sāriputto thero na parihāyittha arahattā, no ca vata re vattabbe— “parihāyati arahā arahattā”ti.
Mahāmoggallāno thero … mahākassapo thero … mahākaccāyano thero … mahākoṭṭhiko thero … mahāpanthako thero na parihāyittha arahattāti? Āmantā. Hañci mahāpanthako thero na parihāyittha arahattā, no ca vata re vattabbe— “parihāyati arahā arahattā”ti.
Suttasādhanaparihāni
Parihāyati arahā arahattāti? Āmantā. Nanu vuttaṁ bhagavatā—
“Uccāvacā hi paṭipadā, Samaṇena pakāsitā; Na pāraṁ diguṇaṁ yanti, Nayidaṁ ekaguṇaṁ mutan”ti.
Attheva suttantoti? Āmantā. Tena hi na vattabbaṁ— “parihāyati arahā arahattā”ti.
Parihāyati arahā arahattāti? Āmantā. Atthi chinnassa chediyanti? Na hevaṁ vattabbe.
Atthi chinnassa chediyanti? Āmantā. Nanu vuttaṁ bhagavatā—
“Vītataṇho anādāno, kiccaṁ yassa na vijjati; Chinnassa chediyaṁ natthi, oghapāso samūhato”ti.
Attheva suttantoti? Āmantā. Tena hi na vattabbaṁ— “atthi chinnassa chediyan”ti.
Parihāyati arahā arahattāti? Āmantā. Atthi katassa paticayoti? Na hevaṁ vattabbe.
Atthi katassa paticayoti? Āmantā. Nanu vuttaṁ bhagavatā—
“Tassa sammā vimuttassa, santacittassa bhikkhuno; Katassa paticayo natthi, karaṇīyaṁ na vijjati.
Selo yathā ekagghano, vātena na samīrati; Evaṁ rūpā rasā saddā, gandhā phassā ca kevalā.
Iṭṭhā dhammā aniṭṭhā ca, nappavedhenti tādino; Ṭhitaṁ cittaṁ vippamuttaṁ, vayaṁ cassānupassatī”ti.
Attheva suttantoti? Āmantā. Tena hi na vattabbaṁ— “atthi katassa paticayo”ti.
Na vattabbaṁ— “parihāyati arahā arahattā”ti? Āmantā. Nanu vuttaṁ bhagavatā— “pañcime, bhikkhave, dhammā samayavimuttassa bhikkhuno parihānāya saṁvattanti. Katame pañca? Kammārāmatā, bhassārāmatā, niddārāmatā, saṅgaṇikārāmatā, yathāvimuttaṁ cittaṁ na paccavekkhati. Ime kho, bhikkhave, pañca dhammā samayavimuttassa bhikkhuno parihānāya saṁvattantī”ti. Attheva suttantoti? Āmantā. Tena hi parihāyati arahā arahattāti.
Atthi arahato kammārāmatāti? Na hevaṁ vattabbe.
Atthi arahato kammārāmatāti? Āmantā. Atthi arahato rāgo kāmarāgo kāmarāgapariyuṭṭhānaṁ kāmarāgasaṁyojanaṁ kāmogho kāmayogo kāmacchandanīvaraṇanti? Na hevaṁ vattabbe.
Atthi arahato bhassārāmatā, atthi arahato niddārāmatā, atthi arahato saṅgaṇikārāmatāti? Na hevaṁ vattabbe.
Atthi arahato saṅgaṇikārāmatāti? Āmantā. Atthi arahato rāgo kāmarāgo kāmarāgapariyuṭṭhānaṁ kāmarāgasaṁyojanaṁ kāmogho kāmayogo kāmacchandanīvaraṇanti? Na hevaṁ vattabbe.
Parihāyati arahā arahattāti? Āmantā. Arahā arahattā parihāyamāno kiṁ pariyuṭṭhito parihāyatīti? Rāgapariyuṭṭhito parihāyatīti. Pariyuṭṭhānaṁ kiṁ paṭicca uppajjatīti? Anusayaṁ paṭicca uppajjatīti. Atthi arahato anusayāti? Na hevaṁ vattabbe.
Atthi arahato anusayāti? Āmantā. Atthi arahato kāmarāgānusayo paṭighānusayo mānānusayo diṭṭhānusayo vicikicchānusayo bhavarāgānusayo avijjānusayoti? Na hevaṁ vattabbe.
Dosapariyuṭṭhito parihāyatīti …pe… mohapariyuṭṭhito parihāyatīti …. Pariyuṭṭhānaṁ kiṁ paṭicca uppajjatīti? Anusayaṁ paṭicca uppajjatīti. Atthi arahato anusayāti? Na hevaṁ vattabbe …pe….
Atthi arahato anusayāti? Āmantā. Atthi arahato kāmarāgānusayo …pe… avijjānusayoti? Na hevaṁ vattabbe.
Parihāyati arahā arahattāti? Āmantā. Arahato arahattā parihāyamānassa kiṁ upacayaṁ gacchatīti? Rāgo upacayaṁ gacchatīti. Sakkāyadiṭṭhi upacayaṁ gacchatīti, vicikicchā upacayaṁ gacchatīti, sīlabbataparāmāso upacayaṁ gacchatīti? Na hevaṁ vattabbe. Doso upacayaṁ gacchatīti …pe… moho upacayaṁ gacchatīti, sakkāyadiṭṭhi upacayaṁ gacchatīti, vicikicchā upacayaṁ gacchatīti, sīlabbataparāmāso upacayaṁ gacchatīti? Na hevaṁ vattabbe.
Parihāyati arahā arahattāti? Āmantā. Arahā ācinatīti? Na hevaṁ vattabbe. Arahā apacinatīti? Na hevaṁ vattabbe. Arahā pajahatīti? Na hevaṁ vattabbe. Arahā upādiyatīti? Na hevaṁ vattabbe. Arahā visinetīti? Na hevaṁ vattabbe. Arahā ussinetīti? Na hevaṁ vattabbe. Arahā vidhūpetīti? Na hevaṁ vattabbe. Arahā sandhūpetīti? Na hevaṁ vattabbe.
Nanu arahā nevācinati na apacinati apacinitvā ṭhitoti? Āmantā. Hañci arahā nevācinati na apacinati apacinitvā ṭhito, no ca vata re vattabbe— “parihāyati arahā arahattā”ti.
Nanu arahā neva pajahati na upādiyati pajahitvā ṭhitoti? Āmantā. Hañci arahā neva pajahati na upādiyati pajahitvā ṭhito, no ca vata re vattabbe— “parihāyati arahā arahattā”ti.
Nanu arahā neva visineti na ussineti visinitvā ṭhitoti? Āmantā. Hañci arahā neva visineti na ussineti visinitvā ṭhito, no ca vata re vattabbe— “parihāyati arahā arahattā”ti.
Nanu arahā neva vidhūpeti na sandhūpeti vidhūpetvā ṭhitoti? Āmantā. Hañci arahā neva vidhūpeti na sandhūpeti vidhūpetvā ṭhito, no ca vata re vattabbe— “parihāyati arahā arahattā”ti.